(ភ្នំពេញ)៖ ភាពរំភើបញាប់ញ័របានគ្របដណ្ដប់ពេញផ្ទៃទីលានប្រកួត ខណៈដែលកីឡាករប៉េតង់មកពីគ្រប់ទិសទី បានធ្វើដំណើរមកដល់ទីលានប្រកួតដោយជោគជ័យ ដើម្បីចូលរួមក្នុងព្រឹត្តិការណ៍ដ៏ធំប្រចាំឆ្នាំ "Provida Challengers - Season 1" នៅថ្ងៃទី ២៩ ខែមីនា ឆ្នាំ ២០២៦ នេះ។
តាំងពីព្រលឹមស្រាងៗ សង្កេតឃើញវត្តមានកីឡាករក្នុងឯកសណ្ឋានដ៏ស្រស់ស្អាត បានមកជួបជុំគ្នាកម្តៅសាច់ដុំ និងស៊ាំទៅនឹងទីលានប្រកួត។ ទឹកមុខដែលពោរពេញដោយភាពជឿជាក់ និងស្មារតីតស៊ូរបស់កីឡាករម្នាក់ៗ បានបញ្ជាក់យ៉ាងច្បាស់ពីការត្រៀមខ្លួនរួចជាស្រេច ដើម្បីដណ្ដើមយកជ័យជំនះ និងបង្ហាញពីសមត្ថភាពពិតប្រាកដ។

នៅលើទីលានដែលត្រូវបានរៀបចំយ៉ាងមានរបៀបរៀបរយ ជាមួយនឹងតង់សម្រាក និងសម្ភារៈបច្ចេកទេសស្ដង់ដារ ក្រុមការងាររៀបចំការប្រកួតបានទទួលស្វាគមន៍កីឡាករយ៉ាងកក់ក្ដៅ។ ការជួបជុំគ្នានេះ មិនត្រឹមតែជាការប្រកួតដណ្ដើមពានរង្វាន់ប៉ុណ្ណោះទេ ប៉ុន្តែវាក៏ជាការជួបជុំមហាគ្រួសារប៉េតង់ ដើម្បីរឹតចំណងសាមគ្គីភាព និងលើកស្ទួយវិស័យកីឡាមួយនេះឱ្យកាន់តែរីកចម្រើន។

រដូវកាលទី ១ នេះត្រូវបានគេរំពឹងថាជានឹងមានការប្រកួតយ៉ាងស្វិតស្វាញបំផុត ដោយសារវត្តមានកីឡាករដែលមានបច្ចេកទេសខ្ពស់ៗ និងយុទ្ធសាស្ត្របោះប៊ូលដ៏អស្ចារ្យ។ គ្រប់គ្រាប់ប៊ូលដែលនឹងត្រូវបោះចេញនៅថ្ងៃនេះ នឹងក្លាយជាការកំណត់វាសនាឆ្ពោះទៅរកជ័យជម្នះ។